Un traballador resultou ferido este martes no municipio pontevedrés de Salvaterra de Miño ao recibir un golpe na cara mentres realizaba as súas tarefas nun camiño de terra dunha área forestal. O accidente tivo lugar ás 11,45 horas nunha zona de monte de San Paio, segundo informou o CIAE 112 Galicia.

Unha vez localizado, os profesionais de Urxencias Sanitarias 061 recolleron ao operario e trasladárono ao centro de saúde de Salvaterra, onde foi avaliado. Os efectivos do centro solicitaron a intervención do helicóptero do 061 con base en Santiago, que recolleu ao ferido despois de aterrar na zona das piscinas fluviais.