“En outubro de 2017, As Neves foi varrido polas lapas, cinco mil hectáreas, deixando catro familias desaloxadas e destruíndo 46 segundas vivendas e tres empresas. E reduciu todo o verde a negrume e cinza“. Así o recordan nun artigo o diario portugúes Jornal de Noticias.
“O Goberno da Galiza foi acusado de fallar na defensa das poboacións. Miles saíron á rúa en Vigo para unha manifestación co lema “Lume nunca máis”. Xa ardía desde dous días antes en Portugal e á mañá do 15 de outubro comezamos a ver o incendio aproximarse ao Miño”, lembran.
As Neves, “zona cero” dos incendios en Galicia. Desde o JN lembraron como ergueuse e venceu aos lumes, por suposto despois de sufrir perdas enormes, grazas a “un exército de voluntarios e doazóns de centenares de particulares e de cerca de 50 empresas españolas e portuguesas. Auga, comida para animais, materiais, aportaron todo o que fora necesario”.
Subliñaron tamén como “a distribución porta a porta de auga engarrafada prolongouse até tres meses tras o “vendaval de lumes”, que destruíu canalizacións e deixou pozos e ríos contaminados”. E, durante a traxedia,”o Concello creou a estrutura, mais se non fose polo grupo de voluntarios nada disto sería posíbel. Foron máis de 100 persoas a traballar”.
Dende o xornal, tamén aproveitaron para denunciar que non chegasen aínda “a axuda á reconstrución das vivendas, propiedades, empresas e estruturas públicas destruídas ou damnificadas”.
E concluíron: “A paisaxe recupérase lentamente. Foron replantadas dúas mil árbores autóctonas. Do lado de Monção, o parque forestal destruído continúa en cinzas. Só unha vivenda, das cinco que ficaron destruídas, foi reconstruída pola propietaria, que avanzou a expensas propias. Falta o apoio do Goberno”.
