Científicos do Instituto Español de Ocenagrafía de Vigo (IEO-CSIC) publicaron un artigo científico que, por primeira vez, explora a rede social Twitter para analizar o grao de concienciación pública sobre o lixo mariño e coñecer que perfis de usuarios están tuiteando e como, cando e desde onde.

O estudo analiza un total de case 150.000 tuits sobre a contaminación mariña por plásticos publicados durante oito meses e redactado en algún dos 12 idiomas máis empregados nesta rede social. Os países con máis volume de tuits son EEUU, Reino Unido, Xapón e Canada. Porén, cando se pondera o número de usuarios activos na rede social, en España móstrase un marcado interese nesta problemática.

Os resultados tamén mostran como o discurso xeral está moi influenciado pola celebración online de eventos como “Día da Terra”, o “Día Mundial das tartarugas mariñas” ou a celebracío durante o verán do “Xullo sen plástico”. Neste sentido, a crise sanitaria derivada da Covid-19 tamén influíu na conversación pola preocupación ante o aumento de plásticos dun só uso, especialmente de máscaras e luvas. Segundo expón o investigador, Pablo Otero, o estudo servirá “para comprender quen tuitea sobre o problema do lixo mariño e como o fai”, axudando así “ás institucións a deseñar unha comunicación eficaz nesta canle”.