O grupo municipal do BNG criticou este luns a “inacción” da Xunta e do Concello de Vigo fronte ao “insoportable” encarecemento do prezo da vivenda, advertindo de que as medidas anunciadas por ambas as administracións “non van resolver a emerxencia habitacional” da cidade.
O portavoz do BNG, Xabier Pérez Igrexas, puxo en cuestión o proxecto piloto Casa47 anunciado pola ministra. “Para quen é accesible un piso a máis de 600 euros mensuais?”, preguntou, e afeou ao alcalde, Abel Caballero, que “presuma” dunha iniciativa con apenas 67 vivendas, “sen prazo de execución e cun prezo que supera o custo medio actual do metro cadrado para aluguer” en Vigo. O concelleiro nacionalista lembrou que o prezo medio do aluguer se sitúa hoxe 200 euros por riba do que había en 2019 e responsabilizou a Xunta e o goberno local, agravando a situación polo aumento da oferta de pisos turísticos.
No caso do Concello, Igrexas incidiu na “parálise” do goberno de Caballero, reflectida en que a Empresa Municipal de Vivenda anunciada hai meses “non se vai a constituír antes de final de ano”. O BNG esixiu medidas inmediatas, entre elas, a solicitude para declarar a cidade como zona tensionada do mercado de vivenda.
RESPOSTA DO GOBERNO LOCAL
En resposta a estas críticas, a concelleira de Urbanismo, María José Caride, amosou a súa “sorpresa” porque os nacionalistas piden ao goberno de Vigo que faga “o que non fan os alcaldes do BNG alí onde gobernan”. Caride asegurou que a Empresa Municipal de Vivenda “está en marcha”, e estará dotada “única e exclusivamente” con fondos do Concello, “dentro das limitadas competencias en materia de vivenda” que ten a administración local. Subliñou que van “facer o posible para contribuír a ter un parque público de vivendas en aluguer a prezo taxado na cidade”.
Con todo, a concelleira socialista insistiu en que a “competencia hexemónica” é da Xunta, da que censurou a súa “inacción” durante 15 anos de goberno. Caride defendeu que o Concello impulsa un Observatorio da Vivenda, un programa de compra de inmobles para aluguer alcanzable e a construción de vivenda social en chan municipal (como en Santa Cristina de Lavadores). Finalmente, Caride acusou o BNG de “entorpecer” estes programas, lembrando que “tiveron unha magnífica oportunidade de apoiar unha política municipal de vivenda, que foi apoiar o Plan Xeral, co 37 % de vivendas en réxime de protección”. A concelleira concluíu que, en lugar de apoiar esa vivenda accesible, “o BNG votou en contra dos intereses dos vigueses e a favor dos intereses dos especuladores”.
