Nada en Santiago de Compostela e criada en Ordes, Lidia Cao é técnica superior de Ilustración pola EASD Pablo Picasso. “Desde pequena xa tiña algo co que debuxar na man e tense visto que a día de hoxe aínda non o soltou”, destacan dende a páxina oficial de Vigo Cidade de Cor, programa municipal que neste ano acada a súa terceira edición e no que participa esta artista gráfica.

Cao é unha apaixoada dos retratos, amante do extraordinario de “expresar tanto en tan só unha cara”. No seu traballo destacan as figuras femininas con trasfondo, coma a xigantesca que está a elaborar no túnel fronte á entrada do porto de Vigo.

Desde Vigo Cidade de Cor dividen a súa obra en dúas partes: “A primeira, a máis realista,detallada e en branco e negro; a segunda, máis animada, entrando tamén no ámbito do muralismo. Estas dúas partes son moi opostas, xa que na primeira dedícase a traballar en formatos pequeniños e reducidos, mentres que na segunda gústalle experimentar a ilustración en formatos diferentes, sobretodo en paredes”.

Contou coa oportunidade de participar en obradoiros sobre graffiti e arte urbana desde cativa, como no DesOrdes Creativas, o Rexenera Fest ou o Compostela Contemporánea. E unha pequeniña parte da beleza de Vigo xa leva a súa firma.