A misión BIXO da UVigo SpaceLab é un dos seis proxectos seleccionados para participar no programa Fly Your Satellite! Design Booster Pilot da Axencia Espacial Europea (ESA, polas súas siglas en inglés), o que supón que este equipo, composto por case 40 estudantes de diferentes titulacións da Universidade de Vigo, contará co apoio de especialistas de máximo nivel durante o desenvolvemento desta iniciativa.
Dita misión, que pretende pór en órbita o satélite máis pequeno con cargas biolóxicas, será supervisada pola ESA, que se “implicará de cheo” no peche do deseño e as probas, segundo indicou o coordinador do proxecto, Manuel Diz.
Precisamente Diz mostrouse “tremendamente satisfeito” con este novo éxito para o equipo, que se suma a outros logros recentes como o feito de ser seleccionados pola Academia chinesa de tecnoloxía de vehículos de lanzamento para ser enviado ao espazo en 2024.
Segundo recolle o Diario da Universidade de Vigo (DUVI), competían con outros 11 equipos de estudantes de diferentes universidades europeas, dos que seis pasaron a criba.
O programa ten unha duración dun ano e durante ese tempo a ESA acompañará aos integrantes de UVigo SpaceLab no desenvolvemento da misión.
