Os procuradores e avogados de Vigo uníronse para reivindicar a figura do ex xuíz decano Antonio Romeu, polo que solicitaron formalmente á Xunta nomear unha das salas do novo Palacio de Xustiza co seu nome.

O maxistrado Romeu, que faleceu no mes de febreiro do ano pasado, exerceu en Vigo desde os anos 80 cando os xulgados estaban aínda situados na rúa do Príncipe. Decano dos xulgados vigueses nos anos 90 e gran defensor da Xustiza viguesa, é considerado unha figura “crave” no desenvolvemento e modernización da administración xudicial na cidade, segundo recollen nun comunicado o Colexio de Procuradores de Vigo.

“A posta en marcha da nova Cidade da Xustiza en Vigo é un feito determinante para o futuro de todos os profesionais da Xustiza na nosa área, do mesmo xeito que o foi a creación das salas da Audiencia provincial. Dous momentos da historia da Xustiza de Vigo que cremos deben estar vinculados por un mesmo nome, o do maxistrado emérito do Tribunal Supremo e Vigués Distinguido, Antonio Romeu Lorenzo”, destacaron os Colexios de Procuradores e Avogados de Vigo na súa carta á Xunta.

A petición dos profesionais súmase á realizada polo pleno de maxistrados da Audiencia Provincial de Pontevedra, que solicitan o recoñecemento público para Romeu na Cidade da Xustiza.