O Goberno trasladou a súa confianza en que a proposta que puxo sobre a mesa á patronal do transporte, para evitar o ‘paro do Nadal’ do sector, sirva para lograr este venres un acordo “equilibrado”. Así o trasladou a secretaria de Estado de Transporte, Isabel Pardo de Vera, en declaracións aos medios tras manter unha reunión co alcalde de Vigo, Abel Caballero.

Segundo apuntou Pardo de Vera, o Goberno leva traballando tres semanas, “analizando as reivindicacións” da patronal do transporte, e sinalou que “se atenderon unha a unha, en equilibrio xusto e medido” con respecto “ao que atravesan todos os sectores”.

Nese sentido, defendeu que agora os transportistas teñen sobre a mesa unha proposta, “con medidas que supoñen un cambio histórico”, en consideración ao sector e, especificamente, aos condutores. Trátase de medidas, lembrou que implican modificacións lexislativas.

Por todo iso, manifestou a súa esperanza de que a reunión deste venres acabe cun acordo “lexítimo, equilibrado e que deriva do coñecemento do sector e da máxima sensibilidade” do Goberno.