A Policía Local de Vigo tivo que saír este domingo na procura dunha parella que ceara nun restaurante do Casco Vello, marchándose sen abonar a conta. Facilitáronselle datos das características físicas destas persoas, así como da roupa que vestían.

Unha hora máis tarde, ambos foron vistos cando entraban nun coñecido local de copas da zona do Arenal. Foron requiridos, tratándose dun varón de 33 anos e unha muller de 29, ambos españois e veciños doutra Comunidade Autónoma.

Recoñeceron que efectivamente estiveron ceando no Casco Vello e debido a que ela se atopaba mal, marcháronse do local sen pagar; aínda que manifestaron que tiñan toda a intención de volver para abonar a conta.

O importe do consumido superaba os cen euros, e entre as viandas que degustaran se atopaban camaróns, polbo e carne especial de boi; todo iso acompañado de viño albariño. Os requiridos abonaron o importe da factura, que foi entregado á responsable do restaurante, quen nun principio declinou presentar denuncia.