O xulgado do contencioso administrativo número 2 de Vigo ditou sentenza na que desestima integramente o recurso presentado pola Federación de Asociacións de Veciños ‘Eduardo Chao’ de Vigo (FAVEC) contra a resolución da Xunta de Goberno Local que ordena o seu desaloxo do edificio da Praza da Princesa, que vai ser sometido a obras de rehabilitación.
A Federación Veciñal presentou recurso opóndose a ese desaloxo, ao considerar que podería manterse na sede do inmoble (no segundo piso), dado que as obras non van afectar a esa planta, senón ás oficinas dos Servizos Sociais, e argumentando que existe un convenio do 2005 polo que o Concello lle cedeu o dereito a usar esas instalacións durante 25 anos.
No entanto, o xuíz desestimou as súas pretensións e acolleu os argumentos do Concello. Na súa sentenza, o maxistrado expón que o edificio debe ser desaloxado no seu conxunto, aínda que as obras non se vaian a realizar en todas as plantas, para evitar riscos “reais” derivados dos traballos, tal e como expoñen os técnicos.
Así mesmo, sinala que esas obras, contempladas no plan ‘Vigo Vertical’, optan a financiamento europeo (o Concello aspira a pagar a metade dos 640.000 euros de investimento previsto con cargo a fondos FEDER) e que “non son un capricho municipal”, senón que responden a unha necesidade.
Nese sentido, tamén lembrou que a FAVEC foi requirida polo Concello para que abandonase a súa sede no prazo de dous meses, sen facer caso a ese chamamento, nin a requirimentos posteriores.
Finalmente, na súa resolución o xuíz apunta que a entidade veciñal está nunha situación de precarista, mesmo a pesar da existencia do convenio que lle cede o dereito a usar esa sede, e que, como non é un arrendatario, o Concello non ten obrigación de reacollelo.
VALORACIÓN DO GOBERNO LOCAL
A concelleira de Benestar Social do goberno vigués, Yolanda Aguiar, lamentou que a FAVEC “leva meses obstaculizando” unhas obras que son de interese público e que o propio xuíz cualifica como “absolutamente necesarias”.
Ademais, engadiu, “en calidade de precarista”, a Federación “nin sequera tería dereito a que se lle ofreza un local alternativo”, a pesar do cal, o Concello actuou con “xenerosidade” e propúxolle trasladarse a outras instalacións municipais, que a FAVEC rexeitou.
“A sentenza vén pór as cousas no seu sitio, a restablecer o dereito do Concello a realizar unha obra de interese público e que vai mellorar a calidade de vida dos vigueses e dos usuarios dos servivios sociais. Queda claro cal era a intencionalidade da FAVEC lendo o texto da sentenza”, resolveu.
