Vigo acollerá unha marcha contra a violencia machista: “estamos fartas, sentimos rabia”

Terá lugar o 25N ás 20:00 horas e partirá da Vía Norte.

Portavoces da entidade durante a rolda de prensa. FEMINISMO UNITARIO

A semana do 25N regresa cargada de mobilizacións a prol da igualdade das mulleres e contra a violencia machista. Neste contexto, a plataforma Feminismo Unitario de Vigo vén de lanzar unha convocatoria para a mobilización que terá lugar na urbe olívica con motivo da efeméride do xoves.

“Un ano máis Feminismo Unitario Vigo estamos aquí para poñer o foco na violencia machista, que é o conxunto de violencias que sufrimos polo mero feito de sermos mulleres”, destacan dende a plataforma nun comunicado no que aluden ás “moitas formas” desta violencia, “dende as diminutas e cotiás, ata as devastadoras e mortais”. “O machismo adopta unha e mil maneiras de someternos, pero aquí estamos e estaremos a resistir e combatir cada unha delas, porque a loita é o único camiño”, inciden.

Neste aspecto, a plataforma lembra ás 87 mulleres asasinadas dende o pasado 25N, razón pola que “os motivos desta data non cesan e seguen igual de vixentes”. “Estamos fartas, sentimos rabia. Pero non cesaremos de loitar contra o patriarcado que quere acabar con nós. É por iso que o lema deste ano é ‘Transformar a raiba en revolta’, apuntan.

Un lema que soará na mobilización convocada para o xoves 25 de novembro e que que sairá ás 20:00 h. de Vía Norte para percorrer a rúa Urzaiz ata Colón, onde terá lugar a lectura do manifesto e a listaxe de feminicidios, “homenaxeando así ás compañerias asasinadas polo terrorismo machista”.

DEIXAR UN COMENTARIO

Please enter your comment!
Please enter your name here