Cun ERTE xudicializado e aínda en vigor, denuncia a Sección Sindical da CUT en Citroën, a empresa expón a “necesidade” dun novo ERTE. Algo que o sindicato considera unha falta de respecto debido a que o actual “deixou sen cobertura a boa parte da plantilla” e porque o novo anunciado prodúcese “coincidindo coa presentación das axudas públicas que vai recibir para o proxecto Facendo 4.0“, ademais de anunciar dita necesidade sen terllo comunicado á representación sindical”.

A CUT censura que a Xunta reparta cartos públicos “sen compromisos de emprego ou mellora das condicións laborais, sociais e económicas das persoas traballadoras”. E pregúntase, así mesmo, porqué a empresa precisa de cartos públicos se no 2020 tiveron 2.173 millóns de beneficios e no primeiro semestre deste ano 6.926 millóns de euros.

Desta forma, o sindicato reproba estas axudas que servirán só para “adaptar a fábrica para o futuro”, só útiles dende o “punto de vista do útil industrial”, que en nada repercuten nas persoas traballadoras e na “sociedade en xeral”.