O grupo municipal do PP no Concello de Vigo lamentou que as sesións plenarias no consistorio están “secuestradas” polo goberno de Abel Caballero e “perderon a súa utilidade”, converténdose nun órgano “ditatorial” que o rexedor, case sempre “ausente”, concibe como un escenario de “lucimento” dos seus concelleiros, expresando as súas “frustracións” mediante mocións “baleiras de contido”.
Así o trasladou en rolda de prensa o portavoz do grupo, Alfonso Marnotes, quen lembrou que un pleno debe ser “un órgano colexiado de máxima representación, deliberante, de control e fiscalización dos órganos executivos e decisorio nos asuntos de maior transcendencia do Concello.
Con todo, en Vigo “esta definición quedou desterrada e deuse paso a un órgano ditatorial no que un alcalde, ausente, decide que o pleno é un órgano de lucimento dos seus concelleiros e no que poden expresar as súas frustracións mediante mocións baleiras de contido que atacan directamente á administración autonómica, e nas que non se resolve absolutamente ningún problema cidadán”.
Ademais, lamentou que o pleno “perdeu a capacidade de órgano fiscalizador e convertéronse nun faladoiro político”, á vez que lembrou que, a pesar da flexibilización das medidas antiCovid, as sesións séguense celebrando a porta pechada, sen público, e con gran parte dos corporativos participando de forma telemática. A iso súmase o feito de que os plenos en Vigo non se poden seguir en directo por parte dos cidadáns a través da web municipal ou dalgunha outra plataforma.
Marnotes tamén denunciou que a oposición vexa reducida a súa capacidade de fiscalización, ao ter dereito a menos mocións (as iniciativas son proporcionais ao número de concelleiros), mentres que o grupo de goberno acapara o debate presentando o máximo de mocións “e todas en contra da Xunta”. “E é tal a súa obsesión, que se quedaron sen ideas, e levan meses repetindo as mesmas mocións”, apuntou.
Pola súa banda, o concelleiro ‘popular’ Jesús Marco explicou que o seu grupo presentou, en plenos e comisións, un total de 786 preguntas e rogos que o goberno municipal non contestou, a pesar de que se trata de demandas trasladadas “polos propios cidadáns”.
Por outra banda, das 200 mocións presentadas polo grupo do PSOE, 190 foron para criticar ou denunciar á Xunta, e moitas delas repetidas. “Só sobre a ampliación e funcionamento do Ifevi houbo 7 no último ano”, sinalou.
Mentres, Teresa Egerique puxo de relevo a diferenza entre os plenos que se celebran no Concello e os que se celebran no Parlamento de Galicia, onde o presidente da Xunta “comparece cada 15 días e contesta as preguntas da oposición”, do mesmo xeito que fan os conselleiros e outros membros do goberno autonómico. “En Vigo non (…) Abel Caballero, que é o presidente do Pleno, non está. Levántase e vaise. O presidente dos alcaldes de España non preside o seu propio pleno“, engadiu.
