Axentes da Policía Local de Vigo identificaron e denunciaron a un condutor que circulaba nun vehículo sen seguro, baixo os efectos do alcol e que se deu á fuga tras impactar contra varios coches aparcados.

Segundo informaron fontes policiais, os feitos ocorreron na tarde do pasado domingo, cando unha patrulla que se atopaba facendo labores de control de tráfico recibiu un aviso sobre un accidente na rúa Paz. Tratábase dun vehículo que chocara contra outros dous coches estacionados, causándolles danos, e cuxo condutor se deu á fuga.

A Policía Local interceptou ao sospeitoso cando circulaba pola rúa Ourense e, ao darlle o alto, os axentes decatáronse de que presentaba síntomas de estar baixo a influencia de bebidas alcohólicas. Este extremo confirmouse ao realizarlle as probas, que arroxaron un resultado de 1,12 e 1,15 mg/l.

Por estes feitos instruíronse dilixencias por un presunto delito contra a seguridade viaria, así como polo feito de que o coche carecía do seguro obrigatorio, de maneira que foi inmobilizado polos axentes.