Propietarios de cans e mascotas reivindicarán poder ir xuntos á praia
A praia de Samil, en Vigo, será escenario durante a mañá deste domingo dun paseo reivindicativo organizado por PACMA no que propietarios de cans e as súas mascotas mobilizaranse para esixir que se lles permita acceder xuntos a praias, ríos e demais lugares de esparexemento.
Segundo explica o Partido Animalista nun comunicado, non existe informe hixiénico-sanitario algún que relacione a presenza de animais na praia con insalubridade ou riscos para os bañistas, polo que lamentan que unicamente se permita o acceso con cans a pouco máis dun centenar de praias en toda España.
“Non hai rexistros de problemas de convivencia nas poucas praias nas que está permitido o acceso a animais. É inxusto que non sexa algo xeneralizado”, sinalan. A acción #PraiasParaTodos avoga por unha “convivencia harmónica” entre persoas e animais nas praias e outros lugares de lecer.
“Vemos como se realizan botellóns, picnics e festas nos areais, que moitas veces quedan cubertos de lixo. Os animais son máis respectuosos coa contorna, non tiran plástico nin vidro. O importante é que as persoas que os acompañan sexan respectuosas e recollan as deposicións”, argumentan desde PACMA
