O alcalde de Vigo, Abel Caballero, criticou este mércores que tivese que ser el quen reclamase ao Goberno de España 23 millóns de euros para que as auxiliares do estaleiro Barreras puidesen cobrar as súas débedas, mentres que o presidente da Xunta, Alberto Núñez Feijóo “non di nada do naval, está calado”.

Nunha rolda de prensa, o rexedor olívico sinalou que foi el quen reclamou ao Executivo os fondos do tax lease “e conseguiuse”, así como os 23 millóns “para o naval”. Respecto diso, sinalou que, na Conferencia de Presidentes celebrada a pasada semana en Salamanca, tivo que ser “o alcalde de Vigo” o que reclamase atención para a industria naval e pedise, entre outras cuestións, “o paraugas dun fondo europeo” para atender a este sector.

“Non escoitei ningunha outra voz, só falei eu do naval. O presidente da Xunta non falou do naval”, denunciou e cuestionou “para que serve o presidente da Xunta en Vigo” se ten que ser o rexedor o que reclame esas axudas ao sector, ou a implantación de proxectos como a planta de hidróxeno verde, a de baterías eléctricas ou a iniciativa do vehículo conectado.

O Consello de Ministros deste martes deu luz verde ao Ministerio de Industria, Comercio e Turismo para outorgar unha subvención de 23,6 millóns de euros a Caixabank, para sufragar o préstamo concedido á sociedade Aris Rosen (a cuxo nome está o buque de Ritz Carlton ‘Evrima’, que constrúe o estaleiro vigués Barreiras).

O sindicato UGT, que ostenta a presidencia do comité de empresa, sinalou que ese diñeiro se destinará integramente ao pago da débeda que o estaleiro ten coa industria auxiliar que participou no proxecto do cruceiro de luxo.

Precisamente, o grupo municipal Marea de Vigo reclamou a intervención do Ministerio de Industria e a súa entrada no accionariado do estaleiro para garantir que ese diñeiro se destine, efectivamente, a pagar esa débeda.

ACREDORES

Pola súa banda, a plataforma Uninaval, que aglutina á maior parte de acredores da industria auxiliar de Barreiras, sinalou que a subvención aprobada non permitirá custear toda a débeda xerada polo estaleiro con estas empresas.

Así, estiman que a débeda total rolda os 30 millóns e que o último compromiso era pagar “o 50 %” do segundo prazo das débedas do Evrima, uns 14 millóns de euros. No entanto, advertiron de que aínda non teñen confirmación da empresa sobre eses 23 millóns nin sobre a cantidade que se destinará a sufragar estas débedas.

O emblemático estaleiro atópase actualmente en mans da firma Kroll Business, pendente de ser vendido e con parte do seu persoal afectado, desde este mércores, por un expediente temporal de regulación de emprego. O cruceiro de luxo Evrima, o seu único traballo, nin sequera está en Vigo, senón que se atopa nas instalacións de Astander para o seu remate.