A Policía Nacional de Vigo alertou este mércores dun incremento de roubos con forza cometidos en vivendas do centro urbano da cidade e en vivendas unifamiliares do arrabalde, que atribúen a grupos itinerantes, formados por persoas procedentes de países do leste europeo.

Segundo sinalaron fontes policiais, os roubos que se cometeron tiveron lugar durante a tarde ou noite e os autores forzan as portas, danan fechaduras, ou usan chaves falsas e cartóns de plástico para acceder aos portais e domicilios.

Os grupos itinerantes detectados na zona de Vigo son cidadáns croatas, especializados neste tipo de roubos. Fontes policiais explicaron que actúan habitualmente en grupos de dúas ou tres mulleres novas, entre 18 e 22 anos, con pelo longo, complexión delgada, e con indumentaria propia da súa idade, destacando que adoitan levar bolsos de gran tamaño onde poder ocultar os efectos subtraídos. As sospeitosas acceden aos edificios, ben aproveitando cando entra ou sae algún veciño, ou ben utilizando un plástico para abrir o portal.

A Policía tamén advertiu de que, entre as bandas itinerantes que se poden desprazar a Galicia, hai cidadáns xeorxianos, “altamente cualificados”, que violentan as fechaduras utilizando unha ganzúa ou a técnica denominada ‘bumping’, ou a de chave falsa. Estes ladróns utilizan tamén a chamada “sementa”, que consiste en marcar as vivendas cun fío de pegamento que se coloca na parte superior das portas, unindo esta co marco, de tal modo que ao abrir a porta rompe. Neste caso actúan parellas, homes de entre 25 e 35 anos, vestindo roupas discretas, pelo curto ou rapado.

Doutra banda, tamén hai grupos de albaneses, especializados en roubos en domicilio, que acceden ás vivendas forzando portas ou xanelas, ou escalando. Estes delincuentes aproveitan a noite para actuar e evitar ser detectados, e van en grupos de 3 ou 4 individuos de complexión atlética, con roupa escura, utilizando algunha peza para cubrirse o rostro e portando ferramentas e útiles para violentar portas e xanelas.

Por todo iso, a Policía Nacional transmitiu unha mensaxe de prudencia á cidadanía, á que pide que comprobe o peche de portas e xanelas cando se ausentan dos seus domicilios, que non deixen xoias nin obxectos de valor ou que non divulguen a súa marcha, entre outros consellos.

Tamén lembrou que debe avisarse á Policía se se detecta xente estraña no portal ou merodeando pola rúa, se se escoitan ruídos en vivendas baleiras, e que non deben abrirse portas nin portais a descoñecidos.