O grupo municipal da Marea de Vigo non considera unha boa nova a recente elección do delegado David Regades para o ente público, especialmente no talante democrático, xa que, para a Marea de Vigo, “o Pleno da Zona Franca corre o perigo de converterse definitivamente nunha ‘sucursal’ do goberno de Abel Caballero”.
Marea de Vigo segue a considerar que é “un uso absolutamente antidemocrático da maioría absoluta por parte do PSOE vigués” o feito de que dos seis membros que elixe o Concello de Vigo (un nato que é alcalde e cinco que elixe o Pleno) sexan todos exclusivamente do PSOE, “feito inédito na historia da democracia”.
“Mentres noutras Zonas Francas no conxunto do Estado se lle outorgou representación a grupos como o da Marea de Vigo”, defenden, “no caso de Vigo o alcalde decidiu, amarrándose a unha Lei do Partido Popular, que soamente representantes do seu partido, o PSOE, ocuparan esas vacantes, nun claro exercicio de falta de democracia”.
