O propietario dunha taberna situada na rúa Torrecedeira de Vigo foi denunciado tras comprobarse que o establecemento excedía o horario permitido.

Fontes policiais detallaron que os feitos tiveron lugar pouco antes das 2,00 horas da madrugada deste mércores, cando os axentes foron advertidos de que un local incumpría o horario máximo de apertura permitido.

Tras desprazarse ao lugar e comprobar que tres clientes consumían bebidas alcohólicas na terraza da taberna, procederon a denunciar ao propietario polo incumprimento das medidas establecidas pola pandemia.

Por outra banda, sobre as 4,20 horas da madrugada deste domingo, un particular informou que un local da rúa Rogelio Abalde permanecía aberto. Unha vez no lugar, os policías identificaron o propietario do establecemento, no que se atopaban 11 clientes.

Ademais, constataron que o medidor de CO2 se atopaba apagado e que o local carecía de xel hidroalcohólico no acceso e de carteis con información sobre o aforamento. Como consecuencia, levantouse unha acta polas infraccións e advertiuse ao dono de que a non corrección das anomalías levaría o precintado do local.

Noutra orde de cousas, ao redor das 1,20 horas deste martes, os axentes comprobaron que un local situado na rúa Colombia no que se atopaban 12 persoas incumpría o horario permitido tras ser advertidos por un particular.

Por iso, desaloxaron o establecemento e propuxeron para sanción ao xerente por exceder o horario permitido e carecer de follas de reclamacións e do cartel normativizado do sistema de cámaras de videovigilancia.