A CIG desenvolverá unha concentración este mércores 11 diante de Citroën en Vigo ás 13:30 horas “para rexeitar os atrancos da empresa á hora de conciliar a vida laboral e familiar”.
Segundo explicaron en rolda de prensa a responsábel do sector da automoción da CIG-Industria de Vigo, María Xosé García, e a técnica de Igualdade da central, Ester Mariño, “a protesta ten lugar no marco da campaña nacional da Secretaría das Mulleres para visibilizar e combater a discriminación das traballadoras”.
Optaron nesta primeira fase por poñer o acento sobre a conciliación laboral e familiar, e en particular no dereito á redución de xornada, unha cuestión que afecta maioritariamente ás mulleres, xa que arredor do 95% dos traballadores que deciden acurtar o seu tempo de traballo para o coidado de persoas dependentes (fillos, maiores, discapacitados ou enfermos) son mulleres.
O feito de terse escollido Citroën en concreto para iniciar a campaña cunha mobilización diante das súas instalacións en Vigo responde ao que definen como “acordo aberrante” asinado no seu día “por unha empresa destas dimensións” e polos sindicatos SIT-FSI, CCOO e UGT “que limita o goce deste dereito por parte do cadro de persoal, xa que impide que os beneficiarios poidan escoller a porcentaxe que desexan reducir”.
“Isto supón que es trasladado para a quenda de noite cunha bolsa de horas complementarias, polo que sabes a que hora entras pero non cando saes”, subliñan dende o comité de empresa.
Segundo a CIG, na última revisión do acordo incluíronse os casos de violencia de xénero “establecendo unicamente a posibilidade de reducir a xornada, cando se trata dun dereito establecido na propia lei. Parécenos inconcibíbel que haxa sindicatos que se presten a avalar este tipo de acordos”.
Por todo isto, a central do sindicato optou por presentar unha demanda de conflito colectivo contra a empresa e os sindicatos que consideran como “colaboradores necesarios” ao entender que con este tipo de acordos as compañías limitan o dereito á redución de xornada. O xuízo derivado desta denuncia dirimirase no xuízo que se celebrará este luns 16 nos Xulgados de Vigo a partir das 12:00 horas.
“Molesta que as persoas concilien”
Segundo sinalaron dende a CIG, “ás empresas “moléstalles que as persoas poidan conciliar a súa vida laboral e familiar, polo que fan todo o posíbel por poñer atrancos a este dereito”. Neste senso, censuraron que “é moi habitual que as traballadores se atopen con moitos problemas á hora de gozar deste dereito”.
En concreto, citaron casos como os de Pescanova na Coruña (acordo que a CIG tamén levou ao Xulgado e que está pendente de xuízo), Froiz (con prácticas que limitan este dereito) ou o grupo Inditex (que o denega por sistema, “xa que non poden asumir que as persoas escollan o seu horario”).
Con todo, indicaron que a situación é aínda moito peor nas empresas de menos de 250 traballadores, “xa que non están obrigadas por lei a ter un comité de igualdade”.
