As universidades de Vigo e Santiago de Compostela alíanse coa Consellería de Sanidade e o Servizo Galego de Saúde (Sergas) para mellorar a calidade asistencial sanitaria que se presta á cidadanía e optimizar deste xeito a utilización dos recursos dispoñibles.
Para isto, o titular da carteira sanitaria autonómica, Jesús Vázquez Almuíña, e os reitores de Vigo, Manuel Reigosa, e Santiago, Antonio López, asinaron este luns un convenio de colaboración.
A finalidade deste acordo é o desenvolvemento dunha liña de traballo conxunto para implantar un sistema de avaliación asistencial cun deseño metodolóxico científico (obxectivo, de rigor e de excelencia) que garanta medir os resultados en saúde nos pacientes galegos, consecuencia das intervencións asistenciais implantadas no Sergas. O proxecto dirixirase ás patoloxías de maior impacto asistencial ou máis prevalentes.
Os estudos, que realizarán conxuntamente o Sergas e as universidades, permitirán cuantificar con rigor os resultados en saúde dos diferentes tratamentos ou intervencións sanitarias en patoloxías que, pola súa prevalencia ou gravidade, teñan especial interese sociosanitario ou requiran un especial seguimento da efectividade das intervencións efectuadas.
Os criterios de selección dos estudos a abordar serán determinados polo Sergas e rexeranse por razóns de impacto asistencial ou social, pola gravidade da enfermidade, a efectividade da atención sanitaria ou polas necesidades asistenciais.
Grupos de traballo interdisciplinares
Para o desenvolvemento deste proxecto contarase cun grupo de investigadores expertos nos distintos campos que comprende este tipo de estudos (metodoloxía, epidemioloxía, economía da saúde, estatística, etcétera) que pertenzan ás tres institucións públicas e implicaranse tamén os sistemas de información de análise complexas e a Hexin, a Plataforma de Big Data corporativa do Servizo Galego de Saúde.
A liña de traballo consistirá no deseño e desenvolvemento de estudos que permitan avaliar os tratamentos e intervencións sanitarias en termos de efectividade, seguridade e eficiencia, o seu impacto na saúde da poboación e na calidade asistencial.
Deste xeito, e en base ao convenio asinado este luns, os profesionais do Sergas achega a experiencia en xestión e coñecemento en materia de asistencia sanitaria, e os expertos das dúas universidades, a metodoloxía científica. O convenio terá unha duración de tres anos e poderá ser prorrogado por dúas anualidades máis.
