Trala denuncia por parte da veciñanza de Torrecedeira da inseguridade cidadá na que están a vivir, con numerosos conflitos nas rúas como roubos ou pelexas, aumentou a presencia policial no barrio.

Pero agora un gran número dos veciños continúan descontentos e non cesa en absoluto a indignación popular posto que observaron un “gran aumento” das multas tanto aos vehículos aparcados en dobre fila (algúns deles comerciantes en accións de carga e descarga) como aos vehículos que, como aparece nesta fotografía, son estacionados en sentido contrario á marcha e o resto de automóbiles.

Algo que, aseguran moitos deles, “non viran nunca”, e aseguran que está a multarse por isto incluso en lugares con liña descontinua. Polo tanto, defenden que a acción policial, máis que solucionar a conflitividade do barrio, está a castigar aos veciños e comercios da zona, que ao non ter lugar onde aparcar vense obrigados a invadir momentaneamente a calzada ou estacionarse en dobre fila para realizar cargas e descargas.

E aos escasos sitios para aparcar súmase a actuación incívica dalgúns condutores que non aproveitan ben o espazo ou deixan o coche aparcado durante días e días, polo que poden pasar máis de media hora buscando estacionamento, ou se cadra volverse misión imposible. O malestar do barrio será visible o próximo luns 9 cunha gran manifestación.