Nana (Santiago de Compostela, 1983) é técnica en xoiería artística e en ilustración. “Xa desde a infancia destacaba por ser unha persoa moi inqueda, asistindo a clases artísticas, e a partir da adolescencia recibe formación do pintor Xurxo Martiño, experimentando con distintas técnicas de debuxo, pintura e modelado”, subliñan dende Vigo Cidade de Cor, programa no que participa cunha homenaxe ás mulleres mariscadoras.
No 2006 iníciase no graffiti e a arte urbana, realizando intervencións na rúa e en espazos
abandonados. A partir da súa experiencia no espazo público decide realizar os seus
estudos de ilustración na EASD Pablo Picasso, onde recibe unha beca Leonardo para estudar en Londres, desenvolvendo o seu traballo en ilustración publicitaria.
Hoxe en día acumula unha extensa traxectoria en festivais de arte urbana, eventos e exhibicións tales como o Desordes Creativas, Mad Poster Art, San Fest, Derrubando Muros con Pintura, Violencia Zero ou Elas Tamén Pintan, onde ten por costume realizar murais de gran formato.
“O seu estilo colorista e orgánico fai que a súa obra, cunha mensaxe claramente feminista, sexa persoal e inconfundible“, engaden. Actualmente traballa como ilustradora, educadora artística e artista mural en 7 H Cooperativa Cultural, realizando diferentes proxectos no ámbito da economía social. Polo xeral, traballa en papel ou na parede con acrílico, aínda que ás veces usa outras ferramentas.
