O Alcalde de Vigo, Abel Cabaleiro; a directora do Centro de Estudos Superiores Aloya, Estefanía Martínez-Brocal; e a directora de Aspanaex, Beatriz Macías; presentaron esta mañá, no Concello de Vigo, a carreira solidaria Aloya 5.0, que se celebrará o vindeiro domingo 17 de xuño, ás 11:00 horas.
A iniciativa, dirixida a público de todas as idades, ten por obxectivo recadar fondos para o proxecto de construción da residencia de Aspanaex no antigo centro de especialidades de Coia, fomentando así a inclusión social das persoas con discapacidade intelectual de Vigo e a súa contorna.
Durante a proba, que comezará na entrada do Centro de Estudos Superiores Aloya, na rúa Couto; os participantes percorrerán 5 quilómetros por cálelas Marqués de Alcedo, Venezuela, Gran Vía, Urzáiz, Colón, García Barbón, Isaac Peral, Arenal, Praza de Compostela, García Olloqui e As Avenidas. A meta estará situada na Praza do Nadador, no Náutico de Vigo, onde todos os participantes recibirán o seu correspondente avituallamento.
As persoas interesadas en participar deben inscribirse na web Cronotec antes das 23:59 horas do xoves 14 de xuño. O prezo do dorsal é de 7 euros e habilitouse tamén un dorsal solidario para quen que desexen colaborar con donativos de 5 e 3 euros. As 500 primeiras inscripcións recibirán unha camiseta conmemorativa da proba.
A retirada de dorsais poderá realizarse no Centro de Estudos Superiores Aloya o venres 15 de xuño, de 16:00h a 20:00h; o sábado 16 de xuño, de 11:00 a 14:00 h e de 16:00 a 20:00 h; e o día da carreira, na zona de saída, de 9:30h a 10:30h.
Estefanía Martínez-Brocal, directora de Aloya, anima a todas as familias viguesas a participar nesta iniciativa que pecha o calendario de actividades organizadas para conmemorar a celebración dos seus cincuenta anos na cidade: “para todos os que formamos parte da gran familia deste Centro é un orgullo pechar o noso aniversario coa celebración desta carreira solidaria que colabora cunha causa tan importante como é a inclusión social das persoas con discapacidade intelectual”.
“Desde aquí queremos animar a todo o mundo, pequenos e maiores, a que se sumen a esta iniciativa e que nos axuden a facer realidade o soño de Aspanaex de poder construír unha residencia para este colectivo. Todos os fondos que recademos destinaranse a esta causa, polo que cantos máis sexamos máis grande será a nosa achega”, engadiu.
Ao término da proba terá lugar a entrega de medallas aos ganadores das diferentes categorías e realizarase un sorteo de agasallos doados por entidades colaboradoras.
