A Sociedade Española de Mecánica de Rocas (SEMR) concedeu unha mención honorífica, no seu premio anual á mellor tese de doutoramento, a unha investigación realizada por Ignacio Pérez Rey, defendida na Escola de Enxeñaría de Minas e Enerxía da Universidade de Vigo, e dirixida polo profesor Leandro Alejano.

Trátase dun estudo experimental dos factores que inflúen no ángulo de fricción básico das descontinuidades rochosas, un parámetro de especial relevancia á hora de analizar a estabilidade das obras, tanto ao descuberto como subterráneas, executadas en macizos rochosos. Este traballo serviu para o desenvolvemento dunha nova metodoloxía de gran utilidade na análise da estabilidade de estruturas xeolóxicas, para o que se utilizou como caso de estudo a coñecida como Pena do Equilibrio, no municipio de Ponteareas.

“Que a tese recibise esta mención é para min un agasallo inesperado do que me alegro moito, porque fixemos un esforzo moi grande para poder realizar traballos comparativos en laboratorios de Portugal, España, Noruega e Turquía”, sinalou o investigador Ignacio Pérez Rey.

A tese podería axudar, por unha banda, a establecer un criterio uniforme na estimación da estabilidade dos noiros, e por outro, contribúe tamén á valoración da estabilidade das estruturas xeolóxicas, como a Pena do Equilibrio. Deste xeito, pode ser aplicado en áreas como, por exemplo, a protección do patrimonio xeolóxico.

Con respecto a ese conxunto xeolóxico de Ponteareas, Ignacio Pérez Rey explicou que a súa elección se debe a que “probablemente represente unha das estruturas máis sorprendentes, desde o punto de vista da estabilidade, para calquera persoa que a observe”.

Este investigador da UVigo incorporouse o pasado ano ao Centro de Estudos e Experimentación de Obras Públicas (CEDEX) en Madrid, onde se dedica á área da mecánica de rocas, enfocada en ensaios de laboratorio.