A manifestación do feminismo foi masiva de novo nas cidades galegas, e Vigo non podía ser menos. Triunfou unha folga ‘cuádruple’: laboral, de consumo, de coidados e estudiantil, convocada por asociacións como a plataforma Galegas 8M.

A plataforma Galegas 8M levaba reuníndose nas vilas de toda Galiza desde o mes de xaneiro, unindo a múltiples colectivos e mulleres individuais, nun traballo conxunto de cara a garantir o éxito da manifestación nacional feminista, co fin de difundir e animar a todas as mulleres da nosa comarca a sumarse aos actos.

O lema non foi outro que “por todas as mulleres, por todos os dereitos: Revolta feminista”, “co fin de reclamar un mundo diferente, no que o dereito a vivirmos unha vida digna se coloque no centro da axenda política, económica e social”, subliñan.

Reclamaban aspectos tan distintos como “a soberanía sobre os nosos corpos e identidades, soberanía sobre os nosos desexos, soberanía sobre a vida que escollemos vivir, soberanía alimentaria, soberanía política para o noso país…”.

Sempre co desexo dunha “sociedade xusta na que os coidados sexan tarefa de todas as persoas e a vida sexa o centro da axenda política, garantir a igualdade de oportunidades e de dereitos nas condicións de traballo e na esfera social, e o dereito a unha vida sen violencias de ningún tipo”.

Para que todo fora un éxito reclamaron aos homes non poucas tareas, entre elas que realizaran durante o 8M as tarefas de coidados (crianza, alimentación, doméstico, maiores) durante todo o día, impedindo que estas queden pendentes e dupliquen o traballo das mulleres os días seguintes á greve.

Tamén, que asumiran “a sobrecarga e a dupla ou tripla xornada que habitualmente realizamos as mulleres. Non cómpre ter lazos familiares, tamén tés amigas, compañeiras de traballo e veciñas”, subliñan.

Así como “difundir e apoiar as convocatorias de greve e mobilizacións, non facer folga nen paros, visibilizar a greve de mulleres nos postos de traballo, aportar económicamente a un peto de resistencia no traballo para axudar ás compañeiras que vaian á folga, e dar todo o protagonismo nos espazos públicos e privados ás mulleres, acompañando a loita feminista neste 8M”.

Deste xeito, as mulleres galegas se sumaban ao Paro Internacional dos feminismos de todo o mundo, “para visibilizar os traballos invisibles que facemos as mulleres e que sustentan a vida de todxs”, subliñan desde Galegas 8M.

FOLGA DE CONSUMO

Tamén demandaban as feministas a necesidade de “visibilizar ante a sociedade a necesidade de romper coa lóxica de consumo capitalista que reforza o sistema e por tanto a posición de desigualdade das mulleres no mesmo, así como que as mulleres ocupamos un espazo importante no sector dos servizos e nos traballos máis precarizados do mercado de consumo”.

“As mulleres galegas loitamos pola soberanía alimentaria dos pobos e contra o empobrecemento das mulleres en todo o planeta, e non queremos contribuír á explotación de ningunha persoa, nen no noso país nen en ningún outro a través do noso modelo de consumo”, selaban, animando a non consumir este 8M “para apoiar a folga”.

FOLGA DE COIDADOS

Tamén foi unha folga de coidados, para “visibilizar ante a sociedade e no entorno familiar todo o traballo de coidados que realizamos a diario, como a xestión da alimentación, coidados de saúde, das crianzas, da limpeza, dos maiores…”

FOLGA ESTUDIANTIL

No que respecta ao ensino, reivindicaban “un ensino público, laico e feminista, estudar figuras de mulleres nos nosos temarios, cambiar que haxa carreiras masculinizadas e feminizadas, acceder a un traballo en condicións de igualdade cos homes, un sistema educativo que teña a perspectiva de xénero como unha competencia transversal e que inclúa unha educación afectivo sexual diversa”.

E, por suposto, tamén “establecer mecanismos efectivos de prevención e denuncia das violencias machistas, mellorar a seguridade nos campus · promover a paridade nos órganos de goberno, e rachar co teito de cristal que existe na Universidade”, entre outras reivindicacións.