O II Tríatlon Illas Estelas de Nigrán inicia este domingo o Circuíto Galego

Presentación da proba en Nigrán / Federación galega de tríatlon

Mañá domingo 6 de maio celébrase en Nigrán o II Tríatlon Illas Estelas, que reunirá a máis de 230 deportistas nas dúas probas previstas. O Tríatlon Illas Estelas é a primeira proba do Circuíto Galego de Tríatlon do presente ano e, por tanto, é clasificatoria para o
Campionato Galego de Tríatlon.

A xornada comezará coa proba mini-sprint (10:00 horas), na que están inscritos máis de 60 deportistas que terán que realizar 300 metros de natación, 13 quilómetros de ciclismo e 2,5 de carreira a pe.

Na proba do circuíto masculina haberá dúas saídas. Ás 11:00 horas partirán os deportistas sen tempo de corte, mentres que a segunda (con tempo de corte) comezará ás 12:20 horas. Será unha proba moi disputada, con deportistas destacados coma Brais Canosa (Arcade Inforhouse), Gustavo Rodríguez (Tri-Penta Terras de Lugo), Marcos Ruiz (Tríatlon Ferrol), Luismi Velásquez (Tri-Penta Terras de Lugo), Pablo Pedrosa (Tríatlon Ferrol) ou Jacobo Martínez (Tríatlon Poio), entre outros.

Na categoría feminina (12:30), Cristina Torres (Mar de Vigo) defende a vitoria do pasado ano, pero terá grandísimas rivais coma Edymar Brea (Tri-Penta Terras de Lugo), Mónica Alarcón (NoSportLimit) ou Marta Barbeito (Náutico de Narón), entre outras. As e os máis de 170 participantes inscritos realizarán 750 metros de natación dende a praia de Panxón, 19,5 quilómetros de ciclismo e 5 de carreira a pe. A saída, transición e meta estarán instaladas na praia de Panxón.

O Circuíto Galego de Tríatlon está formado por cinco probas: Tríatlon Illas Estelas, Tríatlon Cidade de Pontevedra, Tríatlon Concello de Poio, Tríatlon do Miño e Tríatlon Concello de Arteixo.

En 2017, Cristina Torres (Mar de Vigo) e César Otero (Olímpico de Vedra) proclamáronse vencedores do I Tríatlon Illas Estelas, que reuniu a un total de 340 deportistas.

copa do mundo de paratríatlon

Ademais, o domingo 6 de maio (08:00 horas) celebrarase a Copa do Mundo de Paratríatlon de Águilas, na que participará a viguesa Susana Rodríguez Gacio (Mar de Vigo) na proba
PTVI (para deportistas con discapacidade visual).

Será a primeira proba importante da tempada para a galega, que ata agora só competira no Dúatlon Concello de Riveira. Será unha boa oportunidade para probar coa súa nova guía, Paula García Godino, coa que aínda leva moi pouca preparación para adaptarse unha a outra, algo fundamental no paratríatlon. A próxima semana desprazaranse ata
Yokohama, onde disputará a primeira proba das Series Mundiais.

DEIXAR UN COMENTARIO

Please enter your comment!
Please enter your name here