A Asociación Animalista Libera e a Fundación Franz Weber demandaron ao alcalde de Vigo, Abel Caballero, unha posición contundente fronte ás “ocorrencias” da Xunta de Galicia de permitir batidas de xabalís con arco en zonas periurbanas da localidade “en base a un suposto protocolo de actuación que non foi publicado en ningún medio oficial”.

Os animalistas sinalan que existen medidas disuasorias e preventivas “que en ningún caso mencionan a caza como solución e que poden atoparse en traballos profesionais como a  “Guia de mesures per reduir els danys causats per a fauna salvatge en conreus, zones urbanes i infraestructures” elaborada pola Deputación de Barcelona e a Generalitat, baixo a dirección dunha Doutora en Bioloxía.

Algunhas das propostas para evitar danos e “visitas” dos animais silvestres pasan por adaptar os espazos verdes dos municipios a través da chamada xeroxardinería, facéndoos menos apetecibles para a fauna, así como a instalación de señalética específica para previr colisións, e outros métodos como a disuasión auditiva e olfativa.

Neste sentido ambos os colectivos lembran que, aténdose ao contido literal da Lei de Caza de Galicia de 2013 non se podería cazar en zonas periurbanas nin urbanas situadas a menos de 100 metros de vivendas e outros espazos públicos.

FFW e LIBERA! critican “que a única proposta que poña en marcha a Xunta sexa masacrar a todo tipo de animais” e vinculan estas autorizacións coa proximidade de convocatorias electorais, onde o Partido Popular compite coa ultraultradereita para ver quen “quere” máis aos escopeteiros”.