O BNG de Vigo propuxo un plan de apoio ao comercio para avanzar na normalización do galego tras o último caso de “discriminación” denunciado por unha persoa nun establecemento tecnolóxico da rúa Príncipe.

Nun comunicado, o Bloque anunciou que trasladará ao goberno local unha batería de propostas para reforzar o compromiso do Concello coa normalización lingüística, que incluiría a posta en marcha deste plan de apoio ao comercio local para promover a atención en galego ou a creación dunha Oficina Municipal de Dereitos Lingüísticos.

O portavoz nacionalista, Xabier Pérez Igrexas, xustificou estas iniciativas pola “moi preocupante situación que atravesa a lingua galega na maior cidade de Galicia”.

Así, reivindicou que a administración municipal debe asumir un papel “activo” na defensa e na promoción do galego. “Temos que converter ao Concello nun verdadeiro axente implicado na plena normalización da lingua galega en Vigo”, afirmou.

Todo iso despois de que a Mesa pola Normalización Lingüística leva a cabo este martes unha concentración na rúa Príncipe de Vigo para denunciar a “galegofobia” dunha tenda tecnolóxica da cidade por supostamente “negarse” a atender a unha persoa polo feito de falar en galego, sendo isto “unha vulneración clara dos seus dereitos lingüísticos”.