A xunta de goberno de Vigo aprobou este venres o inicio da consulta pública previa para a elaboración dunha futura ordenanza abolicionista da prostitución.

Segundo informou a primeira tenente de alcalde, Carmela Silva, a normativa pretende situar a Vigo entre as cidades que asumen “con claridade” que a prostitución e a explotación sexual constitúen “unha das formas máis graves de violencia e desigualdade contra as mulleres”.

Desta maneira, trátase de “o paso definitivo” para que Vigo “siga sendo unha cidade comprometida coa igualdade, a dignidade e os dereitos humanos”.

Segundo indicou, a ordenanza responderá a un modelo abolicionista que actuará contra quen se lucra coa explotación sexual e contra a demanda que a sostén. Ademais, combinará a persecución da explotación coa protección e o acompañamento das mulleres vítimas.

Para Silva, esta iniciativa é unha mostra de que Vigo quere seguir avanzando como “unha cidade máis xusta, máis igualitaria e libre de toda forma de explotación das mulleres”, augurando que a futura ordenanza será “unha das máis avanzadas do Estado” nesta materia.