O alcalde de Vigo, Abel Caballero, asegurou este mércores que o goberno local non se opón á celebración das festas, senón que quere que se celebren, pero advertiu de que “hai unha lei e ten que cumprirse”.

Así o sinalou en declaracións aos medios, e subliñou que o cumprimento da normativa é máis importante se cabe no caso das festas e a instalación de atraccións porque vela pola seguridade das persoas.

Deste xeito, xustificou que o Concello non validase o plan de autoprotección presentado pola Comisión de Festas de Coia que, nas últimas horas, confirmou a suspensión dos festexos, previstos para os días 4 ao 9 de xullo.

Segundo Abel Caballero, a documentación presentada adoecía dunha serie de problemas, como a falta de identificación da persoa responsable nalgunhas atraccións, e outros incumprimentos normativos. “E claro, fallos desa envergadura teñen que ser emendados en detalle”, explicou.

O alcalde lembrou que o seu goberno multiplicou por tres as subvencións ás festas, e defendeu que se celebren, pero reiterou que deben facerse “cumprindo todas as normas e dando a garantía de que todas as normas se cumpren”. “Quen determina o cumprimento? Os técnicos do Concello. Non son decisións políticas. Son decisións técnicas que ademais están feitas para velar pola seguridade da xente”, engadiu.

Por outra banda, criticou o “oportunismo” do PP, que culpou a Caballero de que non se poidan celebrar este ano unhas festas centenarias como as de Coia. Respecto diso, sinalou que a normativa que se aplica nestes eventos foi aprobada polo Parlamento, pero o PP de Vigo “pide que non se cumpra a lei”.

COMISIÓN DE FESTAS

Mentres, a Comisión de Festas compareceu este mércores ante os medios para explicar a súa decisión de suspender os actos. Así, explicaron que este luns o Concello comunicoulles a decisión de non aceptar o seu plan de autoprotección (enviado á administración local a principios de mes) e que non poden emendar as deficiencias sinaladas no prazo dado, de 5 días.

O presidente da Comisión, Manuel Carreira, subliñou que se presentou toda a documentación legal requirida e que se fixo o plan de autoprotección seguindo as mesmas pautas que o ano pasado. Por iso, concluíu que “o que serviu antes non serve agora”, cando a normativa era a mesma.

Nese sentido, criticou que o Concello lles fai requirimentos “que saben que non podemos cumprir” e advertiu do impacto económico que terá a suspensión da festa non só para a comisión, senón para a economía da contorna.

Así, lembrou que a organización ten que avaliar as perdas, que serán cuantiosas, xa que, ao non haber atraccións (o Concello non contestou ás solicitudes dos feirantes, aínda que avanzou que a maioría non cumpre a normativa), perderán o 80 % dos ingresos. A iso hai que sumar as posibles penalizacións que terán que pagar ás orquestras contratadas e que xa non actuarán, entre elas, a orquestra Panorama.

Do mesmo xeito, advertiron das perdas para negocios como supermercados e hostalaría, moitos dos cales xa han pechados os seus pedidos para eses días, con maior provisión de mercadorías, e mesmo contratos para reforzar o seu persoal.

Finalmente, ante a posición do Concello, a Comisión dá por feito que o ano pasado, coa mesma normativa, optouse por unha maior flexibilidade, pero remarcaron que, neste ano, ninguén lles advertiu de que se incrementarían as esixencias ou que se imporía un cumprimento máis estrito da lei, a pesar das numerosas reunións con técnicos municipais. Ademais, lamentaron que nin a concelleira de Seguridade, Patricia Rodríguez, nin o alcalde, Abel Caballero, quixeron reunirse con eles.