O 25 de novembro de 2015 nacía “Mulleres en acción. Violencia zero” da Deputación de Pontevedra, para apoiar e visibilizar as nosas creadoras galegas, poñendo o foco sobre a tremenda lacra da violencia machista que azouta cada día a nosa sociedade.
Tres anos despois faise memoria para lembrar cada unha das accións “que nos estremeceron, que nos emocionaron, que levaron á participación activa de centos de persoas, da man de creadoras de referencia no eido da acción artística”, sinalan desde a Deputación de Pontevedra.
Así, Vigo acolleu este viernes a primera actividade do programa “Mulleres en Acción. Violencia Zero”, na súa cuarta edición, a performance “Nosotras” da artista madrileña Nieves Correa, sobre o traballo non remunerado, realizado na súa maioría por mulleres.
“Mulleres en acción. Violencia zero” foi nestes anos foco informativo e ocupou portadas e espazos de relevancia nos medios de comunicación, non só locais, senón rexionais e mesmo nacionais.
O cancelo #ViolenciaZero tivo milleiros de impactos nas redes sociais e provocou unha grande interacción co público, especialmente entre as e os máis novos. A deputación de Pontevedra presenta esta 4ª edición “cun programa cheo de reivindicación e talento no que a protagonista é a participación colectiva. Cremos profundamente na experiencia artística compartida e no seu poder para mobilizar conciencias. Por iso apostamos por un programa no que o público, e sobre todo a mocidade, formará parte activa das obras xunto ás creadoras e tomará posición crítica (e artística)”.
A 4.ª edición, que comeza este mes de novembro e se desenvolve desde o Servizo de Igualdade da Deputación de Pontevedra, comprenderá un total de 25 novas accións participativas ao longo dos 12 meses do ano, en 25 concellos da provincia, con performance (Nieves Correa, Luz Darriba, María Vallina, Silvia Antolín, Teresa Búa e Concha Mayordomo), poesía (Iolanda Zúñiga e Estíbaliz Espinosa), música (Rendi Nue, Sara de Sousa, Alba María e Lupe Blanco, Femininoplural e Konafro), graffiti (Doa Oa, Iria Fafián, Lidia Cao e Vanesa Álvarez), danza contemporánea (María Move, Nuria Sotelo e Marta Alonso) e acción escénica (Helen Bertels, Diana Mera, Carmen Conde, Marta Pérez e Cristina Balboa).
Todo un ano visibilizando esta realidade, en contacto e colaboración coa mocidade, co alumnado de centros escolares, asociacións de mulleres, colectivos diversos, corporacións municipais e toda a variedade de públicos que se pode concentrar nunha praza, nunha rúa, nun lugar de tránsito. E a través do empoderamento da muller no eido cultural e artístico.
