A Secretaria de Estado de Turismo, Isabel Oliver, visitou Vigo este xoves tras unha reunión na alcaldía co rexedor da cidade e presidente da Federación de Municipios e Provincias (FEMP), Abel Caballero.
Ámbolos dous firmaron convenios non só para Vigo senón para tódolos municipios de España, referidos á ‘calidade turística’ e mais un ‘código de boas prácticas’ do turismo.
O segundo dos convenios asinados busca a promoción do chamado ‘turismo de congresos’, para o que o Estado vai destinar 250.000 euros, segundo prometiu Oliver. Polo tanto, promocionaranse as cidades que poidan acoller congresos, como é o caso de Vigo.
En definitiva, a Secretaria de Estado e a FEMP quedaron en estreitar a súa relación para impulsar os destinos ‘turísticos intelixentes’.
