Os sindicatos vigueses, entre eles CIG, CC.OO e UGT, chaman á folga o día 1 de maio para unha evolución favorable das clases baixas e medias, damnificadas pola crise e os recortes posteriores a ela.
Así, a CIG chama á cidadanía a participar “masivamente” na manifestación que convocou para o 1 de maio polo Día da Clase Traballadora ante unha situación laboral que considera que “non só non mellorou, senón que continúa empeorando“. Trátase dunha mobilización que ve como un paso previo a unha folga xeral que convocará antes do verán.
A iniciativa foi presentada este venres en Vigo (que será a cidade que acollerá a manifestación central da CIG) polo secretario comarcal do sindicato, Alberto Gonçalves, quen remarcou que a pesar de que os indicadores macroeconómicos mostran síntomas de recuperación, “o desemprego é insoportable” e hai unha “brutal precarización das condicións laborais”.
Neste marco, criticou que os salarios están a ser atacados por que “se priva do emprego”, por que se paga menos ou se fai traballar máis por menos salario, e, indirectamente, polos recortes e a privatización dos servizos públicos e pola “nova campaña” contra as pensións públicas. “Atacan ós salarios para seguir coa explotación obreira”, selou.
Tamén aludiu a que hai “violencia da patronal contra a clase traballadora” a través da “temporalidade, as altas cargas de traballo, o acoso aos traballadores a golpe de sancións e ameazas, o incumprimento dos convenios, as horas extra que non se pagan, e a inacción da autoridade laboral”.
No relativo a Galicia, tamén reprobou a “ausencia de políticas industriais, de emprego e sociais”; un contexto no que manifestou que o “país segue condenado a ser a periferia” de España, porque, “sen industria, ningún país ten futuro”.
CAMIÑO Á FOLGA XERAL
Neste senso, a CIG considerou que “é tempo de facer unha folga xeral”, cuxa data comunicará o propio día 1 de maio. En todo caso, asegurou que será antes do verán, e en concreto no mes de xuño.
Sobre a participación dos sindicatos CC.OO. e UGT nestas mobilizacións, Gonçalves comentou que na CIG están “fartos de esperar”. “Se veñen connosco, serán benvidos, senón xulgará a clase obreira”, espetou.
En relación con iso, a preguntas dos xornalistas respondeu que o sindicato nacionalista defende a unidade de acción coas demais centrais, pero non só para unha manifestación concreta, cando “non a hai na realidade das fábricas e sobre todo cando son cómplices do que está a ocorrer coas pensións”.
Os sindicatos CC.OO. e UXT tamén manifestaranse o próximo 1 de maio en Vigo baixo a lema ‘Tempo de gañar’, para reclamar que o final da crise “tan cacareado” polo Goberno, se faga notar nos petos dos traballadores e nas súas condicións laborais.
A marcha conxunta sairá ás 11.30 horas do cruzamento de Vía Norte con Urzáiz, e finalizará en Montero Ríos, ante a delegación territorial da Xunta en Vigo. Ao tratarse da mobilización principal das dúas centrais, está prevista a presenza dos seus respectivos secretarios xerais en Galicia, Ramón Sarmiento (CC.OO.) e José Antonio Gómez (UXT).
A secretaria comarcal de CC.OO. en Vigo, Amelia Pérez, advertiu de que “é tempo de gañar para os traballadores”, tempo de que haxa “ou repartición da riqueza ou conflito”. Se os resultados da recuperación económica non chegan á clase traballadora, incidiu, “haberá conflito, irá crecendo, e chegará onde teña que chegar”.
Pola súa banda, o responsable comarcal de UXT, Ernesto Fontanes, destacou que, a pesar das cifras macroeconómicas, o paro segue castigando á clase traballadora, especialmente a mulleres e xente moza; a metade dos parados non ten prestación por desemprego; e un 14 por cento dos asalariados están “no limiar da pobreza”.
“Reclamamos máis protección, melloras salariais, e cambiar o modelo do mercado laboral”, proclamou, e fixo un chamamento aos cidadáns para que participen na manifestación do 1 de maio, e nas mobilizacións “que haberá nos próximos meses”.
