A Xunta de Goberno Local de Vigo deu luz verde este venres á contratación das obras para reparar e mellorar o ascensor inclinado da rúa Juan Ramón Jiménez, entre Menéndez Pelayo e Camelias, cun orzamento de 209.000 euros.

Abel Caballero informou, nunhas declaracións remitidas aos medios, de que a reforma permitirá ampliar o acceso á sala de máquinas do elevador e incorporar melloras de iluminación e a instalación dunha varanda.

O rexedor recoñeceu que este ascensor ten avarías frecuentes “polo nivel de utilización que ten“, e matizou que, ademais da dificultade para atopar repostos, por tratarse dun ascensor inclinado, “ten un acceso moi complexo para as reparacións”.