A conselleira de Vivenda, María Martínez Allegue, achegouse este venres ata o concello pontevedrés de Mos, onde a Xunta investirá máis de 4,1 millóns de euros na construción de 20 vivendas de promoción pública en réxime de aluguer no barrio de San Eleuteiro-Tameiga.

Martínez Allegue, xunto ao secretario xeral de Vivenda e Urbanismo, Heriberto García Porto, e a alcaldesa de Mos, Clara Arévalo, achegouse ata a parcela onde se construirá o edificio que albergará estas novas vivendas, para presentar esta obra.

A Xunta licitou o pasado 1 de agosto o contrato desta actuación por máis de 4 millóns de euros, e abriu o 2 de agosto o prazo ás empresas interesadas para a presentación de ofertas, que terminará o próximo 20 de setembro. A conselleira explicou que estas vivendas se adxudicarán en réxime de aluguer e o obxectivo da Xunta e que estean dispoñibles a mediados de 2026.

Tal como destacou a conselleira, desde o Goberno galego traballan para duplicar o parque residencial de toda Galicia e, neste caso, está en plena fase de contratación da construción destas 20 vivendas de promoción pública nesta parroquia de Tameiga.

Martínez Allegue puxo o acento en como esta promoción de Mos sitúase en chan cedido, de maneira gratuíta, polo Concello, sendo neste caso “exemplo da colaboración absolutamente necesaria” das entidades locais para conseguir o compromiso en materia de vivenda.

O novo edificio que se construirá nunha parcela da parroquia de Tameiga terá 3 alturas, albergará 20 vivendas, que terán entre 2 e 4 dormitorios, e contará con 29 prazas de garaxe e 20 trasteiros.