A Garda Civil, en colaboración con axentes da Unidade de Análise de Riscos (UAR) da Aduana de Vigo, interviu no aeroporto de Peinador 780 paquetes de tabaco de contrabando que levaba na súa equipaxe un viaxeiro procedente de Rusia.

Os feitos tiveron lugar a pasada fin de semana cando os efectivos do Destacamento Fiscal da Garda Civil que prestan servizo no aeroporto de Peinador interceptaron, coa colaboración dos axentes da UAR, unha maleta sospeitosa no control aduaneiro da equipaxe que viña facturada nun voo procedente de Rusia con escala en Lisboa.

Ao comprobar o contido da maleta, de dobre fondo, incautáronse un total de 780 paquetes de tabaco das marcas “ Marlboro”, “Kent Blue” e “ Rothmans Of London”. O tabaco atopábase disposto en cartóns e paquetes soltas no interior da maleta facturada e parte del estaba oculto detrás do forro interior da propia maleta.

A maleta fora facturada a nome dun pasaxeiro de nacionalidade rusa, que foi identificado e denunciado ante a Administración de Aduanas e Impostos Especiais de Vigo como suposto autor dunha infracción administrativa de contrabando. O tabaco aprehendido, cuxo valor no mercado aproxímase aos 3.700 euros, foi posto a disposición da Administración de Aduanas.