Un home acusado de violar a unha coñecida tras atoparse nunha discoteca de Vigo aceptou tres anos de cárcere nunha vista de conformidade levada a cabo este mércores na sección quinta da Audiencia Provincial de Pontevedra, con sede na cidade olívica. O home, que se atopa en prisión provisional desde agosto de 2022, enfrontaría entre 8 e 10 anos de cárcere, segundo a petición de Fiscalía e da defensa da vítima, respectivamente. O acusado aceptou tamén unha orde de afastamento de 13 anos sobre a muller, así como o pago dunha responsabilidade civil de 6.200 euros, que xa foi abonada.
Segundo o escrito de acusación pública, os feitos ocorreron na madrugada do 20 de agosto de 2022, cando o acusado se atopou, nunha discoteca de Vigo, coa vítima, á que coñecía desde facía algúns anos e con quen chegara a intimar. Á saída do local convidou á muller a ir á súa casa a “fumar e escoitar música”. A muller accedeu e, unha vez no domicilio del, tombáronse nunha cama de matrimonio. Nun momento dado, a muller decatouse de que o home sacou o pene do pantalón e estáballe rozando a perna, polo que lle chamou a atención e apartouse, tratando de incorporarse.
Nese momento, o acusado abalanzouse sobre ela e suxeitouna para inmobilizala, mentres lle levantaba o vestido e arrincáballe as bragas. A pesar de que ela gritaba e sollozaba, o home tratou de penetrala, aínda que non o logrou. Entón, para que deixase de gritar, empezoulle a golpear a boca e suxeitouna do pescozo, á vez que lle introduciu varios dedos na vagina. O home só desistiu cando se deu conta de que a muller estaba a sangrar pola boca. Nese momento soltouna e ela, tras ir correndo ao baño, abandonou a vivenda gritando e pedindo auxilio.
Por estes feitos, a Fiscalía acusaba ao procesado dun delito de violación (unha agresión sexual agravada) e pedía que fose condenado á pena de oito anos de cárcere, e que se lle prohiba comunicarse ou achegarse a menos de 200 metros da vítima por un período de nove anos. A pesar de todo, finalmente chegouse a unha conformidade de tres anos de prisión, dos cales xa case pasaron dous.
