A Dirección Xeral de Patrimonio Cultural, dependente da Consellería de Cultura, Lingua e Xuventude, comunicou este luns ao Concello de Vigo a autorización do proxecto de humanización da Avenida de Madrid, que foi solicitada polo goberno municipal en marzo. Desta maneira, o departamento autonómico responde así á solicitude para levar a cabo a reforma da devandita vía, no tramo comprendido entre Praza de España e a intersección coa rúa Gandarón (na zona do Alcampo).

Segundo explica a Xunta, a resolución de Patrimonio indica que na contorna de protección existen varios elementos catalogados, como o pazo, os xardíns e a capela de San Roque, o hospital Policlínico Cíes, o Colexio Fogar ou o pazo da Raposeira, polo que lembrou que as intervencións a realizar “resultarán armoniosas coas condicións características do ámbito”. Por iso, deberán buscar a súa integración en materiais, sistemas construtivos, volume, tipoloxía e cromatismo, así como garantir unha contemplación adecuada do ben catalogado. Patrimonio subliña que na zona se descoñece a existencia de xacementos arqueolóxicos, polo que “non hai impedimento” para a execución do proxecto presentado polo Concello.

Todo iso tras a polémica de principios do mes de marzo polo alcalde de Vigo, Abel Caballero, que acusou o Executivo autonómico de bloquear a reforma da Avenida de Madrid, culpándoo pola falta do visto e prace de Augas de Galicia e de Patrimonio.

Con todo, a Xunta replicou naquel momento que pasaran só cinco días desde que se pediu aprobación a Patrimonio, que ten ata tres meses para responder. Ademais, o Concello non pedira nin o permiso a Augas de Galicia, que o solicitou ao día seguinte ás críticas de Caballero e foi aprobado xa a semana pasada.

Esta situación ocorre tras máis de oito anos coa reforma da Avenida de Madrid pendente. En 2016, o Ministerio de Fomento xa comprometera un investimento duns 13,5 millóns para a obra, pero ese convenio co goberno local caducou ao pasar seis anos.