O arquitecto estadounidense Thom Mayne foi o encargado de deseñar o proxecto da nova estación do AVE en Vigo. As obras de construción comezarán este outono, máis concretamente este 5 de novembro. O primeiro de todo será a instalación dun armazón, traballo que levará uns 10 meses, como dixo o alcalde da cidade, Abel Caballero, en rolda de prensa.

Logo chegarán outros pasos como a adecuación dos accesos, cun elevado custe de 10,7 millóns de euros que curiosamente serán cofinanciados entre o Concello e a Xunta, que aportan 2,3 e 1,7 millóns de euros cada un. O resto da inversión corre a cargo de Adif.

Mentres que o goberno de Caballero se encargará da reordenación do tráfico e de construír un túnel de acceso, a Xunta realizará obras de acceso á estación de autobuses.

Abel Caballero, en cambio, desmarcouse e precisou que o goberno galego “non ten nada que ver coa estación do AVE”, e que “se limitará a construír unha terminal de autobuses”. Incluso advertiu á Xunta de que “queremos que a estación de buses teña un deseño acorde con Thom Mayne, non un pastiche diante dunha gran obra”.