O PSOE do Porriño esixiu este venres ao PP que se desculpe tras confirmarse o arquivo definitivo da coñecida como “causa das rozas” (separada en dúas pezas) contra a exalcaldesa socialista, Eva García de la Torre (falecida en xaneiro de 2022), ao rexeitar a Audiencia de Pontevedra os recursos do Concello e do grupo municipal ‘popular’ fronte ao arquivo decretado polo xulgado de instrución porriñés.
Xa en agosto do ano pasado, o xulgado de primeira instancia resolveu o arquivo da causa aberta contra a ex-rexedora, dous concelleiros (Orlando Márquez, do PSOE e Manuel Carrera, de UDDL) e varios empresarios e familiares por suposta prevaricación, falsidade documental e tráfico de influencias, na adxudicación duns traballos de roza. O xulgado de instrución, que xa non entrou a analizar a actuación de García de la Torre, decretou o arquivo ao non ter resultado acreditada a comisión dos delitos, en liña coa posición da Fiscalía.
O Concello e o PP presentaron recurso e agora a Audiencia confirmou ese arquivo xudicial. No caso do Consistorio, o recurso presentouse para interesar que a causa seguise contra as empresas investigadas e os seus responsables, pero o tribunal sinala que, ao non haber indicios de criminalidade na actuación dos cargos municipais non pode habelos nas empresas contratistas.
Con respecto ao recurso do PP, igualmente a Audiencia apunta que as actuacións dos concelleiros non foron constitutivas de delito porque non quedou acreditado que Orlando Márquez dese o visto e prace a traballos que non foron realizados, nin que Manuel Carrera presionase para que se contratase con empresas dos seus achegados. Así mesmo, no que se refire ás modificacións de crédito e recoñecementos extraxudiciais o tribunal ve xustificada a súa tramitación para pagar as facturas.
Os feitos denunciados polo PP remóntanse ao período 2015-2018, durante o mandato da socialista Eva García de la Torre, cando se contrataron servizos de limpeza viaria e roza sen expedientes administrativos, de forma verbal. As empresas limitábanse a pasar facturas ao Concello (sempre menores de 18.000 euros) e a administración pagaba, ata que empezou a haber diferenzas cos contratistas e estes acudiron aos xulgados.
Esta forma de proceder mantívose no tempo, a pesar das advertencias da Intervención e a Secretaría municipal sobre as irregularidades. A alcaldesa levantaba os reparos e acudía a recoñecementos extraxudiciais de crédito para o abono dos servizos.
PEDIR DESCULPAS POLOS “DESPREZOS E MENTIRAS”
Os concelleiros socialistas na corporación porriñesa, David Alonso e Estela Táboas, xunto a outros membros do partido, compareceron este venres ante os medios para dar conta deste arquivo xudicial e para reclamar novamente a dimisión do alcalde, Alejandro Lorenzo (PP) e dos concelleiros que asinaron as denuncias agora arquivadas, que deberían “pedir desculpas públicas”.
Os membros do PSdeG do Porriño lamentaron “o asedio, ameazas, publicacións tendenciosas, desprezos e mentiras vertidas polo PP” cara a García de la Torre e Orlando Márquez. “Desgraciadamente, Eva non puido aguantar a presión á que se viu sometida, falecía pouco despois de perder o goberno a mans do PP, sen facerse xustiza, humillada e insultada polas calumnias acreditadas xudicialmente de Alejandro Lorenzo e Nelson Santos (ex-rexedor do PP), que como mínimo deberían pedir desculpas públicas á familia da alcaldesa”, expresaron desde do PSOE porriñés.
Con respecto a Orlando Márquez, valoraron que “sempre” estivo “moi tranquilo” con respecto a esas acusacións, pero subliñaron que Márquez “merece o respecto que os populares porriñeses lle deben, así como aos demais denunciados”.
Os socialistas constataron que os recursos de Concello e PP “o único” que lograron foi atrasar a firmeza do arquivo e “aumentar a incerteza” dos investigados, ademais de atrasar o pago ás empresas que prestaron servizos ao Concello. “Alejandro Lorenzo debería pensar seriamente na súa dimisión tras mentir en numerosas ocasións a todos os porriñeses”, resolveron.
