O alcalde de Vigo, Abel Caballero, vén de recoñecer a desaparición da Área Metropolitana, acusando a Feijóo de “rebentala” nos tribunais, posto que “non quere que Vigo teña o status que ten que ter”. “Feijóo é un mal perdedor. Cando gana nas urnas vai de campión, pero cando as urnas o derrotan, vai aos tribunais”, insistiu.
Mentres, a portavoz do PP na cidade olívica, Elena Muñoz, acusa a Caballero de “bloquear” a Área Metropolitana por “querer saltarse a lei”. “Sen transporte metropolitana non hai área, porque o di a lei”, repetiu.
Pola súa banda, Marea de Vigo comparte co PSOE de Caballero a opinión de que o PP quixo “dinamitar” a Área Metropolitana viguesa, pero ao mesmo tempo culpa ao goberno local por como elaboraron o convenio para o transporte metropolitano.
E o vicepresidente da Xunta, Alfonso Rueda, celebrou a sentencia do Tribunal Superior de Xustiza de Galicia (TSXG). O máis alto tribunal de Galicia rexeitou este 11 de outubro os recursos de apelación que interpuxeran os Concellos de Vigo, Nigrán, Salceda, Gondomar, Cangas, Porriño e Moaña, contra a suspensión cautelar da Área Metropolitana viguesa que decretara un xulgado da nosa cidade trala solicitude da Xunta.
Rueda advertiu que a Área Metropolitana non funcionará “mentres o Concello non entre no plan de transporte como din a lei e os tribunais”. A Lei da Área Metropolitana que establecera a Xunta de Galicia en 2012 sinala que estas áreas deben nacer “despregando tódolos seus efectos”, sendo indispensable “un transporte público más barato e mellor para tódolos habitantes do área”.
