Dous adultos e un menor tiveron que ser trasladados polos servizos sanitarios con síntomas de intoxicación de gas tras producirse unha posible fuga de gas natural dun quentador da súa vivenda situada na parroquia de Oia, en Vigo.

Segundo informou o 112 Galicia, unha das persoas afectadas contactou coa central de emerxencias pouco antes das 04,30 horas deste domingo. Na súa chamada indicaba que a súa muller presentaba síntomas compatibles cunha intoxicación por gas e, minutos despois, alertaba de que o seu fillo, menor de idade, comezaba a ter os mesmos síntomas e el mesmo se atopaba un pouco mareado.

Con esta información, os xestores do 112 Galicia deron aviso ao Servizo de Urxencias Sanitarias de Galicia-061, aos Bombeiros de Vigo, aos axentes da Policía Local e aos membros de Protección Civil de Vigo.

Tras a evacuación da familia ao centro hospitalario de referencia, os bombeiros sinalaron que todo apunta a unha fuga de gas natural dun quentador, polo que procederon a pechar a chave e a ventilar a vivenda.