Nove persoas, seis adultos e tres nenos, quedáronse atrapados no ascensor Halo de Vigo, a uns 25 metros de altura, aínda que ningún deles requiriu asistencia sanitaria, segundo confirmaron fontes do CIAE 112 Galicia.
Os servizos de Emerxencias recibiron a chamada dun particular sobre as 18,15 horas deste xoves, na que informaba de que o ascensor panorámico se parara a metade do percorrido e que levaban uns 10 minutos atrapadas nove persoas.
Segundo o seu relato, estiveran chamando ao botón de emerxencias do ascensor, pero non recibira ningunha resposta. O 112 informou do ocorrido a Protección Civil, Bombeiros (que non tiveron que intervir) e Policía Local de Vigo.
O elevador panorámico, na rúa Serafín Avendaño, foi posto en marcha o pasado 16 de febreiro e a estrutura consta de dous ascensores que percorren verticalmente uns 50 metros, ademais dunha estrutura circular que sobrevoa a autoestrada AP-9 e conecta co complexo intermodal Vialia.
