A Policía Local de Vigo procedeu esta fin de semana á detención dun home de 32 anos de idade, nacido en República Dominicana e domicilio en Nigrán (Pontevedra) por condución temeraria, agresión, e conducir baixo a influencia de bebidas alcohólicas.
Ás 01:50 horas do sábado 07 de outubro, axentes da Policía Local que circulaban en funcións de prevención pola rúa Reconquista observaron como un turismo da marca Peugeot 206 circulaba coa música moi alta, zigzagueando e pasando semáforos en fase vermella na confluencia da rúa Reconquista con Policarpo Sanz, polo que decidiron seguir ao devandito vehículo.
Na confluencia de Velázquez Moreno con Policarpo Sanz o condutor volveu saltarse o semáforo en fase vermella, momento no que os actuantes activaron os luminosos do vehículo indicando ao seu condutor que detivese o turismo, pero este tratou de fuxir circulando polo centro da calzada e invadindo por completo o carril de circulación contrario, zigzagueando pola Avenida de García Barbón e obrigando aos demais condutores a esquivalo para evitar unha colisión.
Os policías, nun momento dado, adiantaron ao devandito vehículo colocándose diante do mesmo, freando o vehículo policial brevemente en varias ocasións para obrigar ao Peugeot a que reducira a velocidade, ata que provocaron a súa detención.
O condutor presentaba claros síntomas de atoparse baixo os efectos do consumo de bebidas alcohólicas, polo que solicitaron a presenza da Unidade de Atestados para a realización de próbalas pertinentes.
Mentres tanto os Policías solicitaron ao condutor que se identificase, pero este en un primeiro momento negouse, volvéndose cada vez máis violento, braceando, chegando a empuxar a un dos compoñentes para logo tentar golpealo, polo que os actuantes víronse obrigados a reducilo ofrecendo esta gran resistencia activa.
Finalmente xa máis acougado accedeu a realizar a proba de alcoholemia, a cal deu un resultado positivo de 0,70 e 0,62 miligramos de alcol por litro de aire expirado, superando o limite penal establecido, sendo detido por un delito contra a Seguridade Viaria.
