Este mércores presentouse na cafetería Detrás del Marco o festival Revoltallo, que se celebra desde mañá venres ata o día 9 de setembro na carballeira de Valadares. Trátase dun festival que aposta pola música galega e por actividades complementarias máis aló da música.

“É un orgullo chegar ás vodas de prata vendo como todos estes anos pasaron por aquí grupos que despois foron emerxendo pouco a pouco” asegurou a presidenta do Centro Veciñal de Valadares, Ana Pérez, referíndose á traxectoria do Festival, que xa cumpre 25 anos.

Precisamente ao papel de dinamización cultural ao longo de todo o ano por parte da veciñanza da parroquia referiuse o deputado de Cultura e Lingua, Xosé Leal, ao tempo que animou “a todo o mundo a achegarse a esta parroquia viguesa tan emblemática para gozar de toda esta diversidade de música”. Por último, Leal cualificou o Revoltallo como “un referente da cultura alternativa tanto en Vigo como a nivel de toda a provincia”.