A Garda Civil incautouse dunha partida de 437 litros de licores tradicionais de fabricación artesanal que se comercializaban de forma fraudulenta, sen ningún tipo de etiqueta nin marca fiscal, nun restaurante do municipio pontevedrés de Soutomaior.
A actuación foi levada a cabo pola patrulla fiscal e de fronteiras da comandancia de Pontevedra, como consecuencia dunha inspección rutineira para comprobar o cumprimento da normativa sanitaria e fiscal da mercadoría en venda.
Durante a operación, segundo indicou a Garda Civil nun comunicado, os axentes localizaron no establecemento 30 garrafas e varias botellas de augardente de herbas, bagazo e licor café que carecían das etiquetas e marcas que dispón a lexislación.
En consecuencia, a patrulla denunciou ao responsable do restaurante por infraccións fiscais e por incumprir a normativa de protección do consumidor, xa que estes licores poderían supor un risco para a saúde pública ao carecer da información sobre a súa elaboración e distribución.
