A Guardia Civil do Posto Principal de Baiona-Nigrán investiga penalmente a un veciño do municipio de Gondomar como presunto autor dun delito de incendio forestal debido, supostamente, a non tomar as medidas de precaución necesarias nunha queima de restrollos.

Segundo informa o Instituto Armado, o incendio ocorreu durante a tarde do pasado mércores nun terreo forestal do lugar de Suas Torres, da parroquia de Baredo, no municipio de Baiona.

As primeiras investigacións apuntan a que o lume se orixinou como consecuencia “de non adoptar as medidas de precaución necesarias nunha queima que se realizou o día anterior nunha parcela do mesmo monte”, indica a Benemérita.

A “rápida intervención dos medios de extinción permitiu que tan só se queimase unha pequena superficie de monte baixo e arborado“, aseguran as mesmas fontes.

Nos labores de extinción participaron os reténs de incendios de Mougás, Redondela, Oia e O Porriño, xunto co axente forestal da zona, unha patrulla do Seprona do Porriño, a Policía Local e efectivos do Posto Principal da Guardia Civil de Baiona-Nigrán.

As dilixencias instruídas foron entregadas no xulgado de Instrución de Vigo correspondente, onde deberá comparecer o investigado cando sexa requirido.

Por iso, o Servizo de Protección da Natureza (Seprona) da Guardia Civil lembra que, segundo determina a normativa vixente en Galicia, para realizar traballos en terreos agrícolas, terreos forestais e zonas de influencia forestal, “nos que sexa imprescindible facer uso do lume, e sempre fóra de perigo alto de incendios”, será “obrigatorio dispor da correspondente comunicación ou autorización de queima, segundo sexan restos agrícolas ou forestais, respectivamente”.