Comerciantes do barrio de San Benito, no Porriño, opóñense á peonalización anunciada polo concello da área viguesa para a zona. Así o veñen de apuntar nun escrito dirixido ás institucións locais e que foi posteriormente difundido aos medios de comunicación no que expoñen as súas razóns para contrariar a medida.

O temor dos empresarios localizados en San Benito pasa por que a peonalización poña fin á circulación de persoas pola zona e, en consecuencia, leve á súa clientela habitual a outros lugares. “Non todos os barrios son iguais”, destacan no comunicado achegado ao Concello e co cal pretenden poñer fin á obra.

Tamén censuran, neste aspecto, que a peonalización do espazo podería dificultar os procesos de carga e descarga nos seus negocios. Por estas razóns, opóñense a que as amentadas obras sigan adiante e piden ao Concello que dea resposta aos documentos: “no caso de que a peonalización fracase, quen se fará cargo das perdas dos nosos negocios?”, conclúen.