InicioDeportesMos rende homenaxe á atleta Soledad Castro: o pavillón Pena de Francia...

Mos rende homenaxe á atleta Soledad Castro: o pavillón Pena de Francia pasa a levar o seu nome

A alcaldesa, Nidia Arévalo, destacou a traxectoria deportiva de Castro e a definiu como "un orgullo para Mos".

PUBLICADO O

- Advertisement -

Este domingo celebrouse un acto de homenaxe á atleta mosense María Soledad Castro Soliño, tralo que o Pavillón Pena de Francia pasa a levar o seu nome. Ademais da homenaxeada, familiares, amigos, e un nutrido público; estiveron presentes o Xefe do Servizo Provincial de Deportes da Xunta de Galicia, Daniel Benavides, a alcaldesa de Mos, Nidia Arévalo, o tenente alcalde, Alberto Méndez, o concelleiro de Deportes, Baldomero Lorenzo, a concelleira de Política Social, Cultura e Turismo, Sara Cebreiro, e demais membros da Corporación Municipal mosense.

O acto contou coas actuacións da agrupación musical Argonat Band e de distintos clubes de patinaxe do Concello de Mos. Esta homenaxe foi o recoñecemento oficial que dende a administración local se lle fai a esta gran deportista, que comezou xogando nun equipo de fútbol feminino da parroquia de Tameiga, fichando logo polo Abrente e que se iniciou no atletismo aos 19 anos, no Celta de Vigo. En novembro do 1992 fichaba polo Comesaña Sporting Club.

Acto homenaxe a Soledad Castro/ Concello de Mos

Sole Castro conta no seu palmarés con numerosas medallas en campionatos a nivel galego e español en campo a través, 10.000 m, 3.000 m e media maratón. Nas competicións internacionais salientan: en 2017 Campioa do Mundo de Media Maratón W-50 na cidade coreana de Daegu, en 2016 Campioa do Mundo de Atletismo de Montaña W50 na localidade de Susa, pertencente á Rexión Piamontesa de Italia, en 2002 Campioa de Europa veterana de 5.000 m e 10.000 m en Potsdam (Alemaña); en 2003 Campioa do Mundo veterana de 10.000 m e Subcampioa do Mundo veterana de Campo a Través e 5.000 m en Carolina (Porto Rico); en 2004 Subcampioa de Europa veterana de 5.000 m e 10.000 m en Århus-Randers (Dinamarca); en 2005 Campioa de Europa W35 de Media Maratón, 2ª xeral en Monte Gordo (Portugal).

Ademais, Soledad Castro xa recibiu a Medalla ao Mérito do Concello de Mos no ano 2006.

Acto homenaxe a Soledad Castro/ Concello de Mos

E o 29 de maio de 2017 o Pleno do Concello aprobou, por unanimidade dos seus membros, dedicarlle o Pavillón Pena de Francia poñéndolle o seu nome.

Sole Castro é enormemente querida na súa parroquia, Dornelas. “Esta excepcional muller que naceu un 25 de maio de 1965, é unha persoa inqueda, que pode presumir de excelencia en cada faceta que desenvolve, deportiva, artística, pictórica e literaria”, salientan desde o Concello de Mos. Precisamente foi a artífice da postal oficial do Concello de Mos do Pasado Nadal e onte volveu a agasallar ao Concello cunha obra súa, neste caso unha acuarela do Pazo de Mos.

Incluso experimentou con outras disciplinas deportivas e iniciouse na práctica da esgrima.

Acto homenaxe a Soledad Castro/ Concello de Mos

Nidia Arévalo, rexedora local mosense, declaraba onte sobre Soledad Castro que “é todo un exemplo de esforzo e superación polo que dende o Concello de Mos quixemos homenaxeala, en recoñecemento dos seus méritos, adicándolle este Pavillón. Sole é unha muller tímida, modesta e menuda que paradoxicamente ten a fortaleza física propia dos deportistas de élite. Non só é Campioa do Mundo, senón que ten un corazón como un mundo e iso é aínda máis importante. É unha gran embaixadora de Mos, un exemplo para todos nós, un espello no que mirarnos e que demostra sempre o orgullo e o cariño que sente polo seu pobo: sempre en contacto coa súa familia e os seus veciños, adorada pola súa parroquia, Dornelas, na que é todo un referente”.

Arévalo concluiu a súa intervención dándolle as grazas a Sole: “Grazas de corazón, grazas unha e mil veces, por ser un orgullo para Mos, por formar parte da historia deste municipio. Mos recordarate e rendirache homenaxe por sempre”.

ÚLTIMAS

Falece un mozo en Vigo tras ter un accidente cunha carretilla elevadora

Un mozo de 24 anos de idade faleceu este xoves en Vigo tras sufrir...

Un ano de cárcere por deixar morrer de fame a cinco cans en Gondomar

Un home aceptou este xoves un ano de cárcere por deixar morrer de fame...

Nova imaxe gráfica do Marisquiño 2024, unha homenaxe aos adhesivos dos 90 no grafiti e ‘skate’

Os artistas Nano4814 e Sekone foron os encargados de deseñar a imaxe gráfica do...

Detido un mozo de 18 anos por roldar a vivenda dunha muller sobre a cal tiña unha orde de afastamento

A Policía Local de Vigo detivo na tarde deste pasado mércores a un mozo, S.G.B. de...